一對情侶嚟睇醫生，個女仔入去診症室，個男嘅就坐喺出面等～
到女仔睇完出嚟，男的問女:醫生話你乜事呀？
女低頭篤電話，冇任何反應。
男的再問:醫生話你乜事呀？
女:我唔講你知呀！你會鬧我嘅～～～
男:即係乜事呀？
女:唔講呀～
男:講啦～唔鬧你呀！
女:你會鬧嘅！
男:講啦，我真係唔鬧你！
女:你一定鬧我嘅～唔講呀～
就係咁我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅， 我唔鬧呀，你鬧我嘅，煩到我爭啲想拎把生果刀出嚟講「唔好用把口齋講啦，一人隊一刀互相增進吓感情啦」
到個女仔拎藥，男嘅一直望住啲藥，一路聽住我講啲藥點食…到我講完，男問我:姑娘，佢乜事呀？
我唔想做夾心榛子醬:…吓？你問返小姐啦…
女:我唔講呀，你鬧我嘅！
男:姑娘，佢有乜病唔講得咁大鑊呀？
女:咦啊，唔好講呀唔好講呀，佢會鬧我㗎！
…即係咁，你哋喺荷爾蒙失調嘅人面前耍花槍，有冇理過我感受？
我:你自己問返小姐啦～
女:唔好問我呀，我唔會講啊，你一定鬧我嘅…
男:我唔鬧呀，你講啦！姑娘，你講呀！
女:唔好講呀，唔好講俾佢知呀～
我都廢事俾反應:嗯，得㗎啦，收咗錢㗎啦，可以走㗎啦…
女:姑娘，佢問你乜，你都唔好答啊！
我:嗯…
男:唔係生cancer呀？
先生，睇你一表人才咁嘅樣，應該讀唔少書，滿肚子都係滾到瀉嘅墨水吧？不如自己睇吓藥袋上面寫乜，斷估唔會收鼻水藥醫癌症嘅…定係你認為佢表面係一粒收鼻水藥，內裡其實係一粒古惑的標靶藥？
啋啋啋～～耶～～～～～～～唔好鬧人啦～
Search